Қазақстан мен Өзбекстан арасында қос дипломды білім беру туралы келісімге қол қойылды
Керемет жаңалық! 27 наурыз 2025 жылы университетіміздің бірінші проректоры Ажидинов Акмалдин Сапардинұлы, оқу істері жөніндегі проректоры Дуйсенов Нұрзақ Жезтайұлы, және «Тілдер жәнен әдебиет» кафедрасы атынан Даулеталиева Динара Мықтыбайқызы Өзбекстан мемлекеті, Ташкент қаласына жасаған іс-сапары нәтижесінде қос дипломды білім беру бағдарламасы бойынша маңызды келісім шартқа қол қойылды. Бұл келісім «Қазақ тілі мен әдебиеті» білім беру бағдарламасы бойынша білім алатын білім алушыларға екі елдің жоғары оқу орындарынан білім алып, қос диплом алуына мүмкіндігін береді, сондай-ақ халықаралық деңгейдегі мамандарды дайындауға зор мүмкіндік ашатыны сөзсіз.
6В01707-«Қазақ тілі мен әдебиеті» қос дипломды білім беру бағдарламасы екі елдің білім беру жүйесінде білім алуға мүмкіндік беріп, олардың халықаралық деңгейде бәсекеге қабілетті болуына ықпал ететін болады. Сонымен қатар, бұл бастама оқу орындарының арасындағы ынтымақтастықты нығайтып, білім алушылар мен профессор оқытушыларына ғылыми зерттеулер мен тәжірибе алмасу мүмкіндігін береді. Осы бірегей бағдарлама арқылы білім алушыларымызға білім сапасы жоғары, халықаралық деңгейде мойындалған мамандар ретінде даярлық жасауға мүмкіндік туады. Бұл өз кезегінде университетіміздің беделін арттырып, жоғары оқу орындары арасында лайықты орынға ие болуына көмектеседі.
Низами атындағы Ташкент мемлекеттік педагогикалық университетімен орнатылған қос дипломды бағдарлама – екі ел арасындағы мәдени және білім беру саласындағы ынтымақтастықтың нығаюына үлес қосып, білім алушыларға тек білім алу ғана емес, сонымен бірге халықаралық ортада өздерін көрсете алатын кәсіби маман болуға мүмкіндік береді. Бұл бағдарлама университетіміздің білім беру жүйесінің жаңа белестерін бағындыруға және болашақ ұрпаққа сапалы білім мен тәрбие беру жолында маңызды рөл атқарады. Қос дипломды бағдарламаның жүзеге асуы университетіміздің академиялық саясатының үздіксіз жаңаруына және халықаралық деңгейдегі білім беру жүйесін қалыптастыруға ұмтылғандығын көрсетеді.
